絕望真相‧病毒

琴日萬世巨星竟然講環保topic，詭異係，嘉賓係雲海。

講環保係因為 donald 睇左《絕望真相》，佢覺得好唔開心，於是就請左雲海上去。我一直淨係知雲海係 ufo 人，唔知原來佢對環保都好有心，佢認為香港o係應用太陽能方面一d野都冇做過，佢去日本九州見到d民居好多都有裝太陽能裝置，煲水呀發電呀，又鼓勵o係天台種植物令內天台氣溫唔會咁高，間接令到屋裏面溫度底d，開少d冷氣。連杭州都有路燈同咪錶係用太陽能，仲要杭州唔似香港咁多陽光，都可以做呢樣野，點解香港一d野都冇做過？佢講個可能原因真係令我覺得好嬲：因為兩電有營利保證。嬲唔嬲？

佢又提起慳電膽，諗起自己都係做得未夠，要換理門口同房燈做慳電膽。

最令我心痛係水源問題，因為全球暖化令冰川溶解，而河流之為河流係因為冰川係春天會溶，所以河會有水，一旦冰川完全消失，河將唔會再流，科學家預計到時球只會得番一半人口有食水可用。呢件事唔係一百年後o既事，而係指日可待o既事。好灰。

據雲海講有個靚人(係我話o既姐，因為我唔記得左佢話呢位仁兄係邊個/男定女)話如果有外星人睇住地球，佢地唔會覺得人係人，佢地會認為我地係病毒，為生存不斷蠶蝕佢o既宿主，真係淒美而太貼切。作為咁毀滅性又優美o既生物，我好想可以做 d 野：

1)講起天台，我諗起我住緊果度個天台，其實我唔係住頂樓，但話說個天台係共用，不過我唔夠膽上去，因為樓上o既鄰居... 但我宜家會考慮o係上面種d野。

2)我己經係公司叫左大家可以放工熄mon同 d 插蘇拖把制，因為佢地都會耗電同排出二氧化碳，小數怕長計，如果全多 d 人都可以咁做，其實就會少好多。有同事種話我不嬲都會熄 mon 架，唔熄 mon 其實好似用遙控閂電視咁講，佢咁講我好開心呀。我仲放左個箱收集回收紙，佢地都好接受，仲話自己條村都有回收箱呀，屋企人都會拎 d 野落樓回收呀咁好正呀~~

3)我係屋企都有收集紙同樽，收埋一堆之後，就拎出去等人收。

比起雲海走去敲 d 政府部門問人做咩放工唔熄燈，我果 d 真係輕 keng。