手慾‧口慾
紅 van 我唔係好肯定，我估起碼大多數係冇落車鐘，要嗌司機先會停車。而綠 van 就應該係全部都有鐘可以手禁。每當我搭綠 van，一定有人手禁鐘，癲 don~~，司機手都唔遞一下，到站，停車，乘客匆匆落車，司機亦好狠想夾死你班衰人咁款，等你隻後腳仲係級上面已經開車，雖然你總能夠全身而退，無比隻門夾住拖行 1 公里都無人知。呢 d 都唔係我想講 o既野。我想講 o既係，點解乘客想手禁鐘？
無鐘 o既年代，大家都嗌：「司機，唔該有落。」熱情 o既司機會答你好呀，叫你小心落車之類，cool d o既都會遞下手，幾咁溫馨細膩。有左個鐘，癲 don，大家近在咫尺，癲 don，司機手都唔遞一下，到站，停車，乘客匆匆落車，司機亦好狠想夾死你班衰人咁款，等你隻後腳仲係級上面已經開車，雖然你總能夠全身而退，無比隻門夾住拖行 1 公里都無人知。呢 d 都唔係我想講 o既野。我想講 o既係，比著我係司機，我都唔會遞手，你明明可以用人同人o既方法同我溝通，雖然只係一句司機，唔該有落，同一句好呀或一下手勢咁短暫 o既溝通，你都選擇癲 don，我會覺得自己唔再係個人，而係一部機器。我唔想承認我係一部我根本唔係 o既機器。
點解綠 van 上面會有鐘？最初點解有呢個構思？唔通因為沙示，個個戴住口罩唔想講野所以要手禁鐘？因為有好多曾經為喉嚨痛所苦 o既乘客比意見小巴公司，意見被接納所以衍生出厘？因為個社會越厘越自閉，為左貼合大眾需要所以要加設呢個自閉設施等大家連呢個小小 o既溝通都可以慳番？最後我會唔會好反高潮咁自爆，其實我都係個手禁鐘客？
圖片來源：進智公交
4 則留言:
我朝朝撘嗰條線唔係架喎...係綠van有鐘仔,不過冇人會禁架喎,個個落車都會嗌"(目的地)落車呀唔該",跟住司機亦會遞一遞手,雖然我唔覺得佢溫馨細膩,但都冇妳講得佢地咁衰喎.
唔通係九龍同新界o既分別?!
其實我只係想搵個位入下 d 小巴司機姐，通常都係紅 van 司機狠 d，綠 van 好少趕住夾腳仔 o既。
司機有落喎，遞手喎，咩唔細膩呀，拍個慢鏡比佢直頭花樣年華 feel。
司機唔係個個狠，有 d 都好，最憎果 d 手都唔遞一下，我鬼知你聽唔聽到呀？可能 d 鐘就係為呢 d hea 爆司機而設，等 d 乘客唔駛疑神疑鬼啦。
好一句花樣年華 feel
我估起因可能係 廢事d乘客嗌得唔夠大聲, 個司機聽唔到而冇停車; 呢D事件好易炒大鑊嫁
可能啦，除非我肯定佢聽唔到，我又唔可能再大聲 d 啦，如果唔係我都唔想手禁鐘
我都知會炒鑊呀，其實有咩好炒，我都試過因為個司機聽唔到o係到串嘴好唔開心，不過過左就無野啦。
發佈留言